MPMS dhe MBPZhR nënshkruajnë marrëveshje bashkëpunimi

Gjatë implementimit të këtij projekti pritet që të punësohen rreth 1 735 punëkërkues.

Sipas këtij memorandumi, MPMS obligohet që me rastin e implementimit të projektit të punësoj punëkërkuesit e regjistruar në zyrat komunale dhe rajonale të punësimit, varësisht ku kryhet projekti, i cili do të zhvillohet në 30 komuna të Republikës së Kosovës.
Përmes kësaj marrëveshjeje MPMS dhe MBPZhR synojnë që të ulet shkalla e papunësisë dhe njëkohësisht ky projekt parasheh zhvillimin dhe koordinimin e të gjitha aktiviteteve që të dy ministritë janë të obliguar t’i përmbushin për një Kosovë me ambient më të pastër dhe sipërfaqe më të gjelbëruara.

Me këtë rast ministri Rashiq është shprehur se brenda mundësive të lejuara MPMS-ja do i përmbush obligimet e veta duke zhvilluar dhe thelluar një bashkëpunim edhe më të mire me MBPZhR dhe me cilëndo ministri tjetër që kanë synime dhe projekte në të mire të qytetarëve të Republikës së Kosovës.
“MPMS do t’i përmbush obligimet e veta dhe Zyrat Komunale për Punësim do të kryejnë punën e tyre në mënyrë shumë të drejtë dhe efikase”, tha pos tjerash z. Rashiq.

Ndërkaq z. Vehapi falenderoi ministrin për kontributin dhe angazhimin e tij personal në përkrahjen dhe mbështetjen në vazhdimësinë të këtij projekti.

Projekti “Një banor një fidan” mëton të shndërrohet në një aktivitet tradicional në Kosovë dhe pos uljes së shkallës së papunësisë, ka për qëllim krijimin e një ambienti sa më të pastër në Kosovë.