Çështjet mjedisore do të jenë në agjendën e Agjencionit për Bashkëpunim Ndërkombëtarë të Qeverisë së Japonisë (JICA)
 Ministri i Mjedisit dhe Planifikimit Hapësinor, Z. Mahir Yagcilar , priti sot drejtoren e re të Zyrës së Agjencionit për Bashkëpunim Ndërkombëtarë nga Japonia (JICA) Znj. Yumi Yasuda .
Në fillim të takimit Znj. Yasuda tha se orientimet e ndihmës së Qeverisë Japoneze janë në dy fusha :
Në Zhvillimin e Resurseve Humane dhe në Mbrojtjen e Mjedisit.
Ministri Yagcilar pasi e falënderoi Znj. Yasuda për vizitën , dhe gatishmërinë për të ofruar përkrahjen dhe ndihmën e tyre, tha se ndër çështjet dhe problemet mjedisore me të cilat përballet Kosova si prioritete tani janë trajtimi i ujërave të zeza dhe mbeturinave e në veçanti mbeturinave të rrezikshme.
Ne si Ministri tani jemi në fazën e hartimit të Strategjisë së Mbeturinave. Trajtimi i mbeturinave dhe ujërave të zeza janë projekte që kërkojnë një kosto të konsiderueshme investimesh , andaj ndihma dhe përkrahja Juaj do të ishte e mirëseardhur, tha ministri Yagcilar.
Znj. Yasuda dhe ministri Yagcilar u pajtuan që bashkërisht edhe me komunat të shikohet mundësia e trajtimit dhe fillimit të realizimit të këtyre projekteve.
“Qëllimi ynë është që të ofrojmë ndihmë në fushën e mjedisit, andaj ndihma e Agjencionit për Bashkëpunim Ndërkombëtar të Japonisë (JICA), nuk do të mungoj por vetëm sa do të intensifikohet çdo herë e më shumë”, tha në fund të takimit drejtoresha e JICA-s Znj. . Yumi Yasuda.
| |
Zyra për informim - MMPH
Prishtinë, 02.02.2010 |
|
