Organizuar nga Ministria e Mjedisit dhe Planifikimit Hapësinor përkatësisht Agjencioni i Kosovës për Mbrojtjen e Mjedisit , Ministria e Energjisë dhe Minierave, Ministria e Shëndetësisë, Ministria e Administrimit të Pushtetit Lokal dhe e mbështetur nga GTZ, sot i përfundoi punimet Konferenca Ndërkombëtare me temën :” Mbrojtja e Mjedisit dhe Efiçienca e Energjisë-Praktikat, Mundësitë dhe Veprimet”.

Pjesëmarrës në këtë Konferencë përveç ekspertëve nga institucionet qeveritare dhe joqeveritare të Kosovës, ishin  edhe ekspertë nga vendet e rajonit dhe ekspertë ndërkombëtarë.

Qëllimi i konferencës ishte që nëpërmes veprimeve të përbashkëta të identifikohen mundësitë dhe mekanizmat për zbatimin e efiçiencës së  energjisë nëpër komuna në funksion të mbrojtjes së mjedisit dhe shëndetit publik.

Motoja  e konferencës ishte:   “Ne Kosovën e re, me energji të  pastër dhe mjedis të shëndetshëm”, ndërsa qëllimi i konferencës ishte  që nëpërmjet veprimeve të përbashkëta të institucioneve qeveritare dhe joqeveritare të nivelit lokal dhe qendror të identifikohen praktikat, mundësitë dhe mekanizmat për zbatimin e efiçiencës së energjisë nëpër komuna në funksion të mbrojtjes së mjedisit dhe shëndetit publik.

Në hapje të konferencës, ministri i MMPH-së, Mahir Yagcilar, tha se jo vetëm në Kosovë por edhe në nivel global, shfrytëzimi i resurseve fosile natyrore si lëndë për prodhim të energjisë, është shkaktari kryesor që ndikon në ngrohjen globale.

“Duke u nisur nga kjo, vëmendja e faktorëve relevant mjedisor si në nivelet lokale ashtu edhe në ato regjionale dhe globale, është e orientuar në reduktimin e emisioneve që krijohen nga shfrytëzimi i këtyre burimeve. Ne si Ministri e Mjedisit , jemi të orientuar që politikat tona mjedisore të jenë në përputhje me ato globale. Përveç favorizimit të përdorimit të burimeve të ripërtritshme të energjisë , njëra ndër masat më efektive për reduktimin e gazrave , është zbatimi i efiçiences së energjisë. Kjo Konferencë është një mundësi e mirë për të kontribuar për mbrojtjen e mjedisit dhe shëndetit tonë”, tha në hapje të Konferencës, ministri Yagcilar.

Ministrja e Energjisë dhe Minierave, Justina Pula-Shiroka, potencoi faktin se sot në Evropë dhe në botë i kushtohet vëmendje e veçantë efiçiencës së energjisë për arsye se kursimi i energjisë kontribuon direkt në mbrojtjen e mjedisit dhe gjithashtu edhe në ngritjen e ekonomisë së vendit.

Konferenca për dy ditë rresht i vazhdoi punimet në dy sesione të cilat ishin të ndara në tri grupe punuese në të cilat kontributin e tyre e dhanë ekspert vendorë dhe ndërkombëtarë.